Higit 9K Manilenyo nakatanggap na ng 2nd booster

MANILA, Philippines — Nasa kabuuang 9,051 Manilenyo na ang nabakunahan ng 2nd booster shot kontra COVID-19 sa nagpapatuloy na ‘vaccination drive’ ng lokal na pamahalaan ng Maynila.

Sa datos mula sa Manila City Health Department, nasa 1,679 indibiduwal ang pinakahuling nakapagpaturok ng ikalawang booster shot nitong Mayo 23 (Lunes).

Maaaring makapagpaturok ng ikalawang booster ang mga health workers, senior citizens at mga immunocompromised na indibiduwal sa anuman sa 44 na health centers, anim na district hospitals, at maging sa piling malls tulad ng SM City Manila, SM City San Lazaro, Robinsons Place Manila at Lucky Chinatown Mall.

Umabot naman sa 554,856 indibiduwal na ang nababakunahan ng MHD ng unang dose ng booster shot. Pinakahuling nabakunahan ang nasa 1,370 tao nitong Mayo 23.

Bukod sa nagpapatuloy na bakunahan ng 1st at 2nd booster, inihayag din ng pamahalaang lungsod na nahigitan na nila o lagpas na sa 100% ng kanilang target ang nakakumpleto na ng primary dose ng COVID-19 vaccines.

Nasa kabuuang 1,705,836 indibiduwal na ang fully vaccinated sa Maynila na higit na mataas sa naita­lang populasyon na 1,065,149 ng Commission on Elections, at maging sa tantiyang populasyon na 1,351,487 ng Department of Health (DOH).