Land title ng housing units sa Quezon City, nailipat na sa 66 pamilyang benepisyaryo
MANILA, Philippines — Pormal nang nailipat sa 66 na pamilyang benepisyaryo ang titulo ng housing units mula sa Children International sa Damong Maliit, Bgy. Nagkaisang Nayon, Quezon City.
Nabatid na nai-turnover na rin sa Quezon City government ang mga open spaces sa lugar.
Tinanggap ng mga benepisyaryo ang kanilang mga titulo, kasabay ng paglagda ng Deed of Donation and Acceptance para sa open spaces sa pangunguna nina QC Mayor Joy Belmonte at Mr. Raymond Ciriaco, chairman of the board of trustees ng Children International (Unang Lingap Kapwa Phils. Inc.).
Kasama rin nila si Atty. Jojo Conejero ng Housing Community Development and Resettlement Department at ilang kasapi ng Unang Lingap Kapwa Homeowners Association.
Kaugnay nito, nagpahayag naman ng lubos na pasasalamat ang pamunuan ng QC LGU sa Children International sa ipinagkaloob nilang housing units para sa mga benepisyaryo ng programa, at open spaces naman para sa lokal na pamahalaan.
“Makakaasa po kayo na pangangalagaan at pananatilihing maayos at kapaki-pakinabang para sa QCitizens ang inyong donasyon,” ayon sa QC LGU sa isang pahayag.
- Latest
