Libreng sakay ng MRT-3, extended pa ng 1 buwan
MANILA, Philippines — Pinalawig pa ng Metro Rail Transit Line 3 (MRT-3) at Department of Transportation (DOTr) ng isang buwan ang libreng sakay na ipinagkakaloob nila sa mga train commuters.
Sa paabiso ng MRT-3, nabatid na sa halip na hanggang Abril 30, 2022 lamang, ang naturang libreng sakay program ay magtatagal na hanggang sa Mayo 30, 2022.
“Passengers will be able to continue enjoying free rides at the rehabilitated MRT-3 line until 30 May 2022, anytime between the rail line’s operating hours from 4:40 a.m. and 10:10 p.m.,” ayon sa anunsyo ng MRT-3.
Nabatid na hanggang noong Abril 26 ay umaabot na sa kabuuang 7,227,434 pasahero ang kanilang napagsilbihan sa kanilang free ride program, na sinimulan noong Marso 28, 2022.
Samantala, ayon naman kay DOTr Secretary Arthur Tugade, ang ekstensiyon o pagpapalawig ng libreng sakay ay naglalayong makatulong na mapagaan ang financial burden ng mga commuters, na balik na sa onsite work, ngayong panahon pa namang tumataas ang implasyon at presyo ng mga produktong petrolyo.
Sa panig naman ni MRT-3 OIC-General Manager at Director for Operations Michael J. Capati, sinabi nito na ang pagtaas ng ridership ng MRT-3 na dulot ng implementasyon ng libreng sakay at pagbabalik sa on-site work ng mga manggagawa, ay nakatulong sa kanila upang masubukan pa ang kapasidad at performance ng kanilang mga tren matapos ang isinagawang massive rehabilitation dito.
Ang MRT-3 na bumabagtas sa kahabaan ng EDSA, ang siyang nag-uugnay sa Taft Avenue, Pasay City at North Avenue, Quezon City.
- Latest
