4 arestado sa 2 kilo ng marijuana
MANILA, Philippines — Nasa dalawang kilong pinatuyong dahon ng marijuana ang nasabat ng mga tauhan ng Manila Police District (MPD) sa apat na lalaki sa ikinasang buy-bust operation sa Tondo, Maynila nitong Huwebes ng gabi.
Nakilala ang mga suspek na sina Arman Estopin, 32; Bryan Garsola, 27; Marvin Candazo, 30; at Rene Tolentino, 60, pawang mga taga-Tondo, ng naturang siyudad.
Sa ulat ng MPD- Moriones Police Station 2, dakong alas-10:30 ng gabi nang magkasa ang Drug Enforcement Team ng buy-bust operation sa kanto ng Moriones at Wagas St. sa Brgy. 46, Tondo.
Nagawang makabili ng isang pulis na nagpanggap na buyer ng isang plastic sachet ng marijuana.
Nang tanggapin ng tulak ang P500 marked money, dito na kumilos ang mga pulis na pinaligiran ang lugar at inaresto ang apat na suspek.
Nakumpiska sa kanila ang limang malalaking plastic sachet na naglalaman ng marijuana na may timbang na dalawang kilo at nagkakahalaga ng P240,000.
Nahaharap ang mga suspek sa kasong paglabag sa RA 9165 o Comprehensive Dangerous Drugs Act of 2002 sa Manila City Prosecutor’s Office.
- Latest