‘Oplan Baklas’ sinimulan, common poster areas sundin – PNP
MANILA, Philippines — Sa pagsisimula ng kampanya noong Martes, sisimulan din ng Philippine National Police (PNP) ang ‘Oplan Baklas’ sa mga malalaking campaign posters na labag na sa ipinatutupad ng Commission on Elections (Comelec).
Ayon kay PNP Spokesman PCol. Jean Fajardo, nagsimula nang mag-ikot ang mga pulis sa pakikipag-ugnayan sa local COMELEC officers upang suyurin ang mga lugar na napaulat na may ilegal na nakapaskil na campaign posters.
Apela ni Fajardo sa mga kandidato at kanilang mga supporter na sundin ang mga common poster areas upang mas maging maayos at malinis ang pangangampanya.
Nakakalungkot lamang na sa kabila ng regulasyon ng COMELEC na sa common poster area lamang magkabit ng campaign materials, naglipana pa rin ang mga ito sa poste at kable ng kuryente, internet, cable, at telephone services.
Dapat na isipin ng mga kandidato at suporters ang integridad ng public utility infrastructures ay isyu ng “public interest” at “environmental at safety grounds” na hindi dapat binabalewala.
Dagdag pa ni Fajardo, isang election offense ang pagpapaskil ng mga campaign materials sa mga ipinagbabawal na lugar lalo na sa mga kawad ng kuryente dahil sa posibleng pagmulan ng sunog.
Hindi aniya sila mangingiming arestuhin ang sinumang matitiyempuhan na nagkakabit ng posters sa mga bawal na lugar.
- Latest
