2 barker huli sa pagbebenta ng pekeng vaccination cards
MANILA, Philippines — Diretso sa kulungan ang dalawang barker makaraang mahuli sa kanila ang mga pekeng vaccination cards na ibinibenta nila sa mga pasahero para makasakay sa mga jeep sa Pasay City, kamakalawa ng gabi.
Nakilala ang mga naaresto na sina Alex Batayan, 39 at Eddie Garcia, 46, kapwa nakatira sa Malibay, Pasay City.
Sa ulat ng Pasay City Police, una silang nakatanggap ng impormasyon sa pagbebenta ng mga barker sa terminal ng jeep sa may Apelo Cruz St., sa Brgy. 151 Malibay, ng mga pekeng vaccination cards sa mga pasahero na hindi pa bakunado o naiwanan ang kanilang vax cards sa halagang P500 para payagan silang makasakay.
Agad na nagkasa ng operasyon ang mga pulis at naaktuhan ang dalawang suspek na pasok sa deskripsyong ibinigay sa kanila. Nang kanilang sitahin at kapkapan ang mga suspek, nadiskubre sa posesyon nila ang isang hinihinalang pekeng vaccination card at isang cellular phone na naglalaman ng kanilang transaksyon.
Nakaditine ngayon ang mga suspek sa Pasay City Police Station -Detention Center at nakatakdang sampahan ng mga kaukulang kaso sa Prosecutor’s Office.
- Latest