Libreng sakay sa Rizal Day, handog ng MRT-3
MANILA, Philippines — May handog na libreng sakay ang pamunuan ng Metro Rail Transit Line 3 (MRT-3) sa mga train commuters nito, bukas, Disyembre 30, 2021, kasabay nang paggunita sa Rizal Day.
Ayon sa MRT-3, ito’y bilang pakikiisa nila sa paggunita at pag-alala ng buong bansa sa kabayanihan ni Gat Jose Rizal.
Nabatid na ang libreng sakay ay maaaring i-avail ng mga pasahero mula 7:00 AM hanggang 9:00 AM, at mula 5:00 PM hanggang 7:00 PM sa nasabing petsa.
Samantala, aalis ang unang tren ng MRT-3 mula sa North Avenue station ng 4:40 AM at mula sa Taft Avenue station ng 5:26 AM. Ang huling tren naman ng linya ay aalis mula sa North Avenue station ng 9:30 PM at mula sa Taft Avenue station ng 10:16 PM.
Upang mapanatili namang ligtas ang biyahe ng mga pasahero, mahigpit pa ring ipinatutupad ang COVID-19 health and safety protocols sa buong linya, gaya ng pagbabawal kumain, uminom, makipag-usap sa telepono, at magsalita sa loob ng mga tren. Mahigpit ding ipinatutupad ang pagsusuot ng face mask samantalang boluntaryo ang pagsusuot ng face shield.
- Latest