2 iskul sa Quezon City, handa na sa face-to-face classes sa Lunes
MANILA, Philippines — Handa na ang dalawang eskwelahan sa Quezon City para sa pilot ng face-to-face classes sa Lunes, Disyembre 6.
Ayon kay Quezon City Mayor Joy Belmonte, ito ay matapos aprubahan ng Department of Education (DepEd) ang face-to-face classes sa Bagong Silangan Elementary School at Payatas B Annex Elementary School sa Brgys. Bagong Silangan at Payatas.
Ayon kay Belmonte, ang dalawang eskwelahan ay kasama sa 28 eskwelahan sa Metro Manila na magsasagawa ng face-to-face classes.
Nabatid na sumailalim na sa safety assessment ng DepEd at Department of Health ang nabanggit na mga eskwelahan.
“Ikinatutuwa ng pamahalaang lungsod na magiging bahagi ng pilot face-to-face classes ang dalawa sa ating mga pampublikong paaralan. Makatitiyak ang mga magulang na magiging ligtas ang kanilang mga anak, maging ang mga guro, sa kanilang pagbabalik-eskwela,” pahayag ni Belmonte.
Idinagdag pa ng alkalde na mayroong isolation rooms at on-standby ambulance ang dalawang eskwelahan.
Mayroon ding tubig, sanitation at hygiene (WASH) facilities, proper ventilation sa mga silid-aralan, sapat na espasyo para sa physical distancing ang mga paaralan.
May nakalagay din na physical barriers, markers at signages.
- Latest