Drug money laundering networks, bubuwagin ng PDEA at AMLC
MANILA, Philippines — Magtutulungan ang Philippine Drug Enforcement Agency (PDEA) at ang Anti-Money Laundering Council (AMLC) upang buwagin ang drug money laundering networks sa bansa.
Kasunod na rin ito ng pormal nang pag-deputized ng AMLC sa mga tauhan ng PDEA upang maging financial investigators nito, sa isang seremonya kahapon sa National Headquarters ng PDEA.
Ang PDEA Deputized Anti-Money Laundering Council Financial Investigators (DAFIs) ay mga PDEA personnel na inatasang mag-imbestiga sa mga financial instruments, gaya ng bank accounts at insurance policies, na ginagamit sa money laundering.
Nabatid na ang financial investigations ay isinasagawa ng AMLC sa mga kaduda-dudang transaksiyon, mga covered transactions na suspicious o kahina-hinala, money laundering (ML) at terrorism financing (TF) activities, at mga paglabag sa Anti-Money Laundering Act of 2001 (AMLA).
Ang mga ebidensiya mula sa mga predicate crimes gaya ng mga drug cases na inihain ng PDEA ay ibinibigay sa AMLC upang makapag-establisa ng probable cause na kinakailangan sa paghahain ng aplikasyon para sa bank inquiry, mga petisyon para sa freeze orders, civil forfeiture cases, at criminal complaints para sa money laundering.
Nabatid na ang masusing pagtutulungan sa pagitan ng PDEA at AMLC ay krusyal para mahadlangan ang drug trafficking groups na magamit ang banking system sa kanilang drug money laundering.
Mula 2011 hanggang 2018, ang AMLC ay nakapag-freeze na umano ng mahigit P2 bilyong halaga ng mga assets ng mga hinihinalang drug personalities.
- Latest
