LRT-2, nagpatupad ng ‘Code Red’ dahil sa problema sa signaling system
MANILA, Philippines — Nagpatupad ang pamunuan ng Light Rail Transit Line 2 (LRT-2) ng ‘Code Red’ kahapon ng umaga matapos na magkaroon ng problema sa kanilang signaling system.
Ayon kay Light Rail Transit Authority (LRTA) Spokesperson Hernando Cabrera, dakong alas-6:00 ng umaga nang magpatupad sila ng ‘Code Red’ o pansamantalang pagtigil ng kanilang operasyon dahil sa naranasang problemang teknikal.
“Paumanhin po sa lahat ng pasahero, pansamatala pong itinigil ang operasyon ng buong LRT2 mula kaninang 6:00 ng umaga dahil sa problema ng signaling system,” tweet pa ni Cabrera.
Kaagad rin namang aniyang inayos ang problema at pagsapit ng alas-7:57 ng umaga ay naibalik na rin sa normal ang operasyon ng kanilang mga tren.
“Balik operasyon na po ang buong LRT2. Pasensiya na po at maraming salamat po sa pag-unawa,” ayon naman kay Cabrera.
Ang LRT-2 ang siyang nag-uugnay sa Claro M. Recto Avenue sa Maynila at Antipolo City.
- Latest
