MANILA, Philippines — Nasa 94 na lugar umano sa National Capital Region (NCR) ang naka-granular lockdown hanggang nitong Miyerkules.
Ayon kay Department of the Interior and Local Government (DILG) Undersecretary at Spokesperson Jonathan Malaya, kabilang sa mga naturang lugar ay 44 lugar sa Maynila, 23 sa Marikina, 17 sa Quezon City, siyam sa Pasay, at isa sa Navotas.
“Iyong iba pong mga LGUs sa Metro Manila ay wala nang granular lockdown na currently being imposed,” pahayag pa ni Malaya, sa isang televised public briefing.
Una nang sinabi ni Malaya na nasa 303 lugar ang naka-granular lockdowns sa pagsisimula ng buwang ito.
Aniya pa, ang Department of Social Welfare and Development (DSWD) ay nakapaglabas na ng may 32,375 food packs simula noong Setyembre 25 upang matulungan ang mga residente sa rehiyon na apektado ng granular lockdowns.
Ang NCR ay nasa ilalim na ng Alert Level 3 simula Oktubre 16 hanggang 31.