MANILA, Philippines — Isang pulis ng Quezon City Police District (QCPD) ang dinakip sa isang entrapment operation matapos kaugnay sa pagkakasangkot sa robbery-extortion activities.
Ayon kay PNP chief Gen. Guillermo Eleazar, naaresto ng mga tauhan ng Integrity Monitoring and Enforcement Group (IMEG) si P/Cpl. Myrldon Linga Yagi, ng QCPD Station 14, sa loob ng Brgy. Hall Annex sa San Simon St. Brgy. Holy Spirit, Quezon City.
Nag-ugat ang pag-aresto kay Yagi sa reklamong inihain ng isang fruit vendor sa Brgy. Pasong Tamo.
Batay sa report, agad na pinosasan si Yagi ng kanyang mga kabaro nang tanggapin ang P2,000 mula sa biktima. Proteksiyon umano ito upang hindi magiba ang kanyang fruit stand.
Maliban sa extortion, pinagbantaan din umano ni Yagi ang tindero sa pamamagitan ng service pistol na dala nito.
Nakuha kay Yagi ang marked cash na ginamit sa entrapment, 9mm pistol, dalawang magazine, PNP identification card at P1,625 na cash.
Pinatututukan din ni Eleazar ang aktibidad ni Yagi sa posibilidad na may galamay pa ito na umiikot sa kanyang nasasakupan.