COVID-19 ward ng PGH, lumuwag na!
MANILA, Philippines — Nakaluwag nang bahagya ang mga medical health workers ng Philippine General Hospital (PGH) dahil sa patuloy na pagbaba ng bilang ng mga pasyenteng may COVID-19 na nakaratay sa kanilang pagamutan.
Sinabi ni PGH spokesperson Dr. Jonas del Rosario na 237 na lamang ang okupado sa kanilang 325 COVID-19 beds.
Ito ay mula sa 355 pasyente na naitala sa kanilang pagamutan noong mga nakalipas na linggo na dahilan ng pagpapahinto sa pagtanggap ng mga pasyenteng may COVID-19.
Sa kabila naman nito, sinabi ni Del Rosario na marami pa rin silang pasyente ngayon na malala at kritikal ang kalagayan dahil sa COVID-19 kaya’t puno pa rin ang kanilang intensive care units (ICU).
“That’s roughly about 75% occupancy. But we still have a lot of patients who are severe and critically ill, which makes our ICU beds always full,” ayon kay del Rosario.
Palagi pa rin naman umanong nakakatanggap ng mga walk-in patients ang kanilang emergency room (ER) ngunit mas umikli na ang panahon na ipaghihintay ng mga pasyente ng COVID-19 para mailipat sila patungo sa ward, na inaabot na lamang ng isa o dalawang araw.
Bagama’t mas nakakahinga na ngayon, hindi pa rin umano makapag-relaks ang kanilang mga healthcare workers dahil sa kailangang maibaba muna sa 200 pasyente ang laman ng kanilang COVID center kaya umaasa sila na magtutuluy-tuloy ang pagbaba ng mga kaso sa Metro Manila.
- Latest
