Pag-eexercise sa labas ng bahay sa Metro Manila, bawal muna!
MANILA, Philippines — Naglabas ng resolusyon ang Metro Manila Council (MMC) na nagbabawal sa pag-eehersisyo sa labas ng bahay, habang umiiral ang ‘enhanced community quarantine (ECQ)’ hanggang Agosto 20.
Sa MMC-MMDA Resolution No. 21-17, ipatutupad ang paghihigpit bilang tugon pa rin para malabanan ang mas mapanganib na Delta variant ng COVID-19 at maampat ang patuloy na pagtaas ng kaso na naranasan nitong nakalipas na mga linggo.
Kaugnay ang MMC resolution sa inilabas na Inter-Agency Task Force for the Management of Emerging Infectious Diseases (IATF) Resolution No. 130-A, na nagdedeklara sa buong National Capital Region sa ilalim ng ECQ mula nitong Agosto 6 hanggang Agosto 20.
“While the Metro Manila Council recognizes the need of the citizenry to engage in various forms of outdoor exercise in order to promote and maintain physical, mental, and emotional health, the Council is also mindful of the fact that staying at home or remaining indoords is one of the best protection against the pandemic during the ECQ,” nakasaad sa resolusyon.
Humingi naman ng pang-unawa ni Metropolitan Manila Development Authority (MMDA) Chairman Benhur Abalos sa publiko dahil sa kailangan umano nilang gawin ito.
“Sana po maunawaan ninyo ang rason bakit itong polisiyang ito ang ginawa nila,” ani Abalos.
“We have to bite the bullet here. All we’re asking for is 10 days. After that the mayors will review the policy,” dagdag pa niya.
Pirmado ang resolusyon ng 17 alkalde ng Metro Manila. Hindi naman nakasaad dito kung paano ang gagawing panghuhuli sa mga lalalabag.
- Latest
