Paglabas ng mga bata, bawal uli - IATF
MANILA, Philippines — Tuluyang binawi ng Inter-Agency Task Force for the Management of Emerging Infectious Disease (IATF) ang kanilang resolusyon na nagpapahintulot lumabas ang mga bata na may edad-5 pataas dahil sa banta ng mas mapanganib na Delta va-riant ng COVID-19 sa bansa.
Mismong si Department of Health (DOH) Secretary Francisco Duque III ang nagkumpirma ng desisyon ng IATF upang mailayo ang mga bata sa impeksyon lalo na at hindi pa sila nababakunahan.
“Ang latest natin diyan ay hindi muna natin papayagan sa ngayon para lang makasiguro tayo,” ayon kay Duque. “Dahil nagkaroon na tayo ng Delta variant, nagkaisa ang IATF na iatras muna itong resolution na ito,” dagdag niya.
Matatandaan na inilabas nitong Hulyo 9 ng IATF ang Resoltion No. 125 na pumapayag na makalabas ng bahay ang mga batang may edad limang taon pataas at makapunta sa mga outdoor areas sa mga lugar na nasa ilalim ng modified general community quarantine (MGCQ) at general community quarantine (GCQ).
Ngunit dahil sa Delta variant, binabawi na ito. Kasalukuyang may 47 Delta variant cases na sa bansa kabilang ang tatlo nang nasawi at walong active cases.
- Latest
