Manila LGU nanindigang hindi sa kanila galing ang ibinebentang bakuna
MANILA, Philippines — Nanindigan ang Manila Health Department (MHD) kahapon na hindi galing sa kanilang ‘cold-storage facilities’ ang COVID-19 vaccines na ibinibenta ng sindikatong nadakip ng mga tauhan ng National Bureau of Investigation (NBI).
Iginiit ni MHD chief Dr. Arnold Pangan na bantay-sarado ang dalawa nilang storage facilities at bilang lahat ng bakuna na nakaimbak sa mga ito. Nasa loob ng Sta. Ana Hospital ng isa nilang storage facility habang nasa Parañaque naman ang isa pa kung saan iniimbak ang mga Sinovac vaccines.
Sinabi naman ni Gat Andres Bonifacio Memorial Medical Center (GABMMC) na hindi kasama sa ‘vaccinating team’ ang nurse nilang si Alexis De Guzman, kasama sa mga suspek na nadakip. May 15 taon na umano siyang nagsisilbi sa pagamutan ngunit kasalukuyang nakatalaga sa Operating Room (OR).
May mga impormasyon naman na negosyante ang misis ni De Guzman at matagal nang nagbebenta ng mga anti-flu at anti-pneumonia vaccines.
Samantala, ikinalungot ng isang opisyal ng Department of Health (DOH) ang kumpirmasyon na may nagaganap na pagbebenta ng bakuna na sangkot pa ang isang nurse makaraang madakip ang mga suspek sa isinagawang entrapmet operation noong nakaraang Huwebes.
“Bakit kailangan magkaroon ng ganitong pagkakataon na people are taking advantage of what we have right now?” ayon kay Health Undersecretary Maria Rosario Vergeire.
Nadakip ng mga tauhan ng National Bureau of Investigation (NBI) sa may Amoranto, Quezon City ang mga suspek na sina Kour Singh, Calvin Roca, at Alexis de Guzman, isang nurse sa Gat Andres Bonifacio Memorial Medical Center sa Maynila.
Pinaalalahanan ni Vergeire ang publiko na huwag bibili ng bakuna sa labas dahil tanging ang gobyerno lamang ang pinanggagalingan sa ngayon ng COVID-19 vaccines na makukuha naman ng libre kung magpaparehistro na ang mga kuwalipikadong mamamayan.
- Latest