Nang-blackmail ng lover, huli sa entrapment

MANILA, Philippines — Timbog sa loob ng isang lodging inn ang isang 32-anyos na lalaking humingi ng P20,000 sa isang Overseas Filipino Worker (OFW) kapalit ng mga hubad na larawan at sex videos sa Sta. Cruz, Maynila, kamakalawa ng gabi.

Kinilala ni Manila Police District director, P/Brig. General Leo Francisco ang suspek na si  Engelvert Nunez , ng Sablayan Occidental Mindoro na nakatakdang sampahan ng reklamong Robbery Extortion at Rape.

Kamakalawa ng gabi nang arestuhin ang suspek sa Lu­xury Lodging Inn, sa Rizal Avenue, Sta. Cruz, Maynila.

Sa reklamo ng biktimang itinago sa pangalang Lyn , 30, saleslady at dating OFW na  hinihingian siya ng pera ng suspek at pinilit na makipagkita sa kaniya sa gitna ng pananakot na ikakalat niya ang mga larawang hubad at sex videos.

Agad na nakipag-ugnayan ang biktima sa District Intelligence Division-District Police Investigation Operations Unit (DID-DPIOU) ng MPD na naglatag ng bitag.

Nang makipagkita na ang biktima sa suspek at pumasok sa Luxury Lodging Inn ay pinuwersa pa umano ng suspect ang biktima na makipagtalik subalit nagawang makatakbo palabas kaya nagkaroon ng pagkakataon ang mga nakaposteng operatiba ng DID-MPD, District Special Operations Unit at Women and Children Section ng MPD para pasukin at arestuhin ang suspek.