Malabon fire: 8 sugatan, 300 pamilya nawalan ng tahanan
MANILA, Philippines — Nasa 300 pamilya ang nawalan ng tahanan, habang walo ang nasugatan sa naganap na sunog sa Malabon City kamakalawa, ayon sa opisyal kahapon.
Sinabi ni Malabon Bureau of Fire Protection (BFP) arson investigator FO3 alas-10:40 ng umaga nang sumiklab ang apoy sa ikalawang palapag ng bahay ni Neri Abagon sa P. Concepcion St. Brgy. Tugatog ng lungsod.
Mabilis na kumalat ang apoy sa mga katabi nitong kabahayan na pawang gawa sa mahihinang uri ng materyales.
Sinabi ni City Fire Marshal Supt. Eduardo Loon, tumagal ng higit sa anim na oras bago idineklarang under control na ng mga bumbero ang sunog dakong alas-4:20 ng hapon dahil nahirapan silang makapasok sanhi ng makitid na mga daanan sa lugar.
Umabot sa 100 kabahayan ang tinupok ng apoy na tuluyang naapula pasado alas-5 ng hapon.
Samantalang tinataya namang aabot sa P2 milyon halaga ng ari-arian ang naabo sa sunog.
Pansamantalang nanunuluyan ang mga apektadong residente sa covered court ng Brgy. Tugatog habang patuloy ang imbestigasyon ng BFP upang matukoy ang sanhi ng nangyaring sunog.
- Latest
