75% ng idinagdag na COVID-19 beds sa Maynila, okupado na rin
MANILA, Philippines — Nasa 75 porsyento na ring okupado ang mga idinagdag na COVID-19 beds sa mga pagamutan sa lungsod ng Maynila dahil sa patuloy na pagtaas ng bilang ng pasyente.
Sinabi ni Manila City Mayor Isko Moreno na nagdagdag na sila ng COVID-19 beds ang kanilang anim na city-run hospitals para tumaas ito sa 523.
Ngunit agad na naokupahan na ang mga ito at 75% o 391 sa mga higaan na ang okupado na ng mga pasyente.
Sa datos, 100% okupado na ang COVID beds sa Gat. Andres Bonifacio Hospital; 94% ang Ospital ng Tondo; at 89% ang Ospital ng Sampaloc.
Mas mababa ang occupancy rate sa Jose Abad Santos General Hospital na 51% higaan ang okupado, 58% ang Ospital ng Maynila at 79% ang Sta. Ana Hospital.
“Out of the 523 COVID beds, 75% na kami (na okupado). Malapit na kami. Medyo scary ‘yun,” anang alkalde, sa panayam sa telebisyon.
Samantala, nanatiling may kaluwagan ang mga quarantine facilities sa lungsod dahil sa 43% pa lamang ng mga ito ang okupado.
- Latest