De Lima tinabla ng 2 hukom
Sa hirit na walang limitasyong pagbisita ng kanyang mga abugado
MANILA, Philippines — Hindi pinagbigyan ng dalawang hukom ang apela ni Senator Leila De Lima na mabisita siya ng kaniyang mga abugado ng walang limitasyon.
Sa magkahiwalay na kautusan, ibinasura ang mosyon ni De Lima ng Muntinlupa City Regional Trial Court (RTC) Branch 205 Judge Liezel Aquiatan at ni Judge Romeo Buenaventura Branch 256 dahil sa kawalan ng merito.
Nabatid na hiniling ni De Lima na utusan ang Philippine National Police (PNP) na pahintulutan ang kaniyang mga abugado na mabisita siya sa PNP Custodial Center sa Quezon City , anumang oras sa anumang araw nang walang limitasyon , habang tumutugon sa COVID-19 safety protocols.
Sa kasalukuyan, hanggang isang oras lamang sa tatlong araw sa loob ng isang linggo ang ibinibigay na panahon sa pagbisita kay De Lima at paisa-isa lang o hindi pwedeng magkakasabay. Dahilan ito para hindi niya magawa ang ‘legal urgent matters’.
Iginiit naman ni Judge Buenaventura na ang pinaiiral na polisiya ng PNP ay upang makontrol ang oras at dalaw at paraan ng pagbisita na nasa kanilang kostudiya para sa kaligtasan at kalusugan ng publiko, gayung patuloy naman na naibibigay ang karapatan ng senadora na makausap ang mga abugado niya para ihanda siya sa pagdinig.
Paliwanag ni Judge Aquiatan, kung pagbibigyan si De Lima sa special benefit, dapat ay pagbigyan din ang iba pang mga preso, na maaring mabisita rin ng sinuman sa piitan, anumang oras at kahit sa gabi.
- Latest