Lalabag sa curfew sa Navotas pagmumultahin na
MANILA, Philippines — Hindi lamang basta community service kundi pagmumultahin na ang mga pasaway na indibiduwal na lalabag sa curfew sa lungsod ng Navotas.
Ito’y kasunod sa ipinasang City Ordinance No. 2021-19 ng pamahalaang lungsod na nagpapataw ng multang P5,000 sa mga lalabag sa curfew mula alas-6 ng gabi hanggang alas -5 ng umaga; mandatory rin ang pagsusuot ng face mask, face shield habang 24 oras naman ang curfew para sa mga menor-de-edad.
Ang pagpapatupad ng curfew ay alinsunod sa umiiral na enhanced community quarantine (ECQ) sa National Capital Region (NCR) Plus bubble na itinatakda ng Inter-Agency Task Force (IATF).
Sa mga nagtatrabaho lalo na sa mga frontliners at essential workers ay kailangan lamang magpakita ang mga ito ng valid identification cards .
Ipinasa ang ordinansa kasunod ng mga ulat na may mga pasaway na nagbibigay ng huwad na impormasyon sa mga barangay enforcers.
Alinsunod sa City Ordinance No. 2021-20 ay inaatasan na maglagay ng mga transparent plastic o acetate barrier ang mga driver at sa pagitan ng mga hanay ng upuan ng public utility jeepney (PUJs) at pagpapanatili ng maayos nitong kondisyon.
Nasa 50% lang ang sasakay na mga pasahero o kalahati ng kapasidad ng sasakyan maliban sa driver at konduktor.
Ang mga lalabag ay pagmumultahin ng P500 sa unang offense, P750 sa ikalawa, at P1,000 para sa pangatlong paglabag.
- Latest