Retoke sa puwit pumalpak, pekeng doktor ipinaaresto
MANILA, Philippines — Isang umano’y pekeng doktor ang dinakip ng mga tauhan ng National Bureau of Investigation (NBI) makaraang ireklamo ng isang babaeng negosyante matapos na pumalpak ang ipinaretoke nitong puwit.
Kinilala ang inaresto na si Gerlon Sadsad na nahaharap ngayon sa kasong paglabag sa Republic Act 2382 o ang The Medical Act of 1959.
Ayon sa NBI, inamin ng biktima na nagpaturok siya sa suspek sa pangako na uumbok ang kaniyang puwitan. Ngunit hindi nangyari ito at sa halip ay namaga, nagkulay talong at nanakit ang bahagi na tinurukan ng suspek.
Dito nagkasa ng entrapment operation ang mga tauhan ng NBI-Special Action Unit sa may Tivoli Garden Residences sa Mandaluyong City na nagresulta sa pagkakadakip sa suspek makaraang hindi siya makapagpakita ng lisensya para magpraktis ng medisina.
Nakumpiska rin sa suspek ang mga syringes, topical anesthesia, at iba pang mga medical equipments at kemikal.
- Latest