P5,000 multa, 1 buwang kulong sa walang face mask sa Caloocan
MANILA, Philippines — Mas lalo pang hinigpitan ng pamahalaang lungsod ng Caloocan ang paggamit ng face mask matapos na maglabas ito ng multang P5,000 at isang buwang pagkakakulong sa sinumang mahuhuli na hindi nagsusuot at maling pagsusuot ng face mask.
Nabatid na nakasaad sa City Ordinance No.0884-2020 na mahigpit na ipinatutupad sa lungsod ang paggamit ng face mask sa lahat ng pampublikong lugar sa Caloocan ngayong panahon ng pandemya.
Ayon kay Caloocan City Mayor Oscar Malapitan, ang nasabing multa ay hindi para pahirapan ang publiko kundi upang disiplinahin at proteksiyunan sila mula sa COVID-19.
Aniya, hindi biro ang biglaang pagtaas ng bilang ng kaso ng COVID lalo na at may mga nagsusulputang ibang variant ng virus.
Dagdag pa ni Malapitan, ang paggamit ng face mask ay simpleng tulong lamang sa mga frontliners na itinataya ang sariling buhay at kalusugan para sa proteksiyon ng publiko.
Samantala, patuloy sa paglobo ang active COVID cases sa lungsod na 756 na nitong 5 pm ng Marso 16. Umabot na sa 15,693 ang tinamaan ng COVID sa siyudad, kung saan 14, 434 na ang gumaling at 503 na ang namamatay.
- Latest