Mayor Vico, negatibo sa COVID-19

MANILA, Philippines — Nagnegatibo sa COVID-19 si Pasig City Mayor Vico Sotto.

Si Sotto ay unang sumailalim sa RT-PCR test nitong Linggo at nagsimulang mag-quarantine matapos na ma-exposed sa kanyang driver na, na nagpositibo sa virus at nitong Biyernes lamang ay tuluyan nang binawian ng buhay.

Nitong Lunes ng hapon naman ay lumabas na ang resulta ng RT-PCR test na isinagawa kay Sotto at negatibo naman ang resulta nito.

“NEGATIVE ang result ng pcr test ko,” anunsiyo ni Sotto, sa kanyang social media account.

Kinumpirma din ng alkalde na sumailalim din sa pagsusuri ang kanilang mga nakasama sa sasakyan at pawang nagnegatibo na rin ang mga ito sa virus.

Kaugnay nito, inaasahang tatapusin pa rin ng alkalde ang kanyang 14-day quarantine period bilang pagtalima sa guidelines ng Department of Health (DOH).

Una na rin namang kinansela ni Sotto ang kanyang mga meeting at appointments ngunit plano aniya niyang ituloy ang trabaho kahit nasa quarantine sa pamamagitan ng Zoom, Viber, Text at mga tawag sa telepono.