Mga abogado puwedeng mag-armas - DOJ

MANILA, Philippines — Maaaring magdala ng armas kahit kailan ang mga abogado para maproteksyunan ang kanilang mga sarili.

Ayon kay Department of Justice Secretary Menardo Guevarra, wala namang makapipigil sa mga abogado sa pagbili ng mga baril bilang proteksyon kasabay ng mga nakakaalarmang kaso ng pagpatay sa kanilang hanay.

“Alam ng mga abo­gado na labis na mapanganib ang kanilang trabaho at walang batas na nagbabawal sa kanila para mag-armas,” ayon kay Guevarra.
Suportado rin umano ito ng pamahalaan at maaari pang tumulong ang gobyerno para mapabilis ang pagkuha nila ng mga lisensya at permit to carry firearms.

Aminado rin ang kalihim na nakakaalarma na ang sunud-sunod na pagpaslang sa mga abogado sa bansa.

Nitong kaagahan ng Marso, sinaksak ng da­lawang hindi nakilalang salarin si Atty. karlo Guillen, isa sa petitioner ng Anti-Terrorism Law.
Tiniyak din niya na magpapatuloy ang DOJ at ang National Bureau of Investigation (NBI) sa pagsasagawa ng imbestigasyon sa mga kaso ng patayan sangkot ang mga abogado para mabigyan sila ng hustisya. Bumuo na umano sila ng imbentar­yo sa mga kasong ito.

Pinayuhan naman niya ang mga abogado na responsibilidad nila na ipaalam sa mga law enforcement agencies kung may natatanggap na pagbabanta sa kanilang buhay para madetermina ito at mabigyan sila ng proteksyon.