Kamay na bakal gagamitin na sa mga pasaway sa protocols
MANILA, Philippines — Nagbabala si Quezon City Mayor Joy Belmonte sa mga lalabag sa health protocols na gagamit na ng kamay na bakal ang lokal na pamahalaan laban sa mga pasaway na itinatakda ng mga ordinansa para labanan ang pagkalat ng COVID-19.
Ito ay ginawa ni Mayor Belmonte sa harap na rin ng pagtaas ng kaso ng COVID-19 sa QC na anya’y dahil sa mga pasaway na sumusuway sa mga ordinansa hinggil sa health protocols.
“Marami sa ating mga kababayan ang hindi siniseryoso ang ating mga ordinansa ukol sa ating health protocols. Now, we will give them a reason to take this very seriously as we won’t be lenient this time around,” pahayag ni Belmonte.
Nairita si Belmonte nang ihayag ni Dr. Rolly Cruz, head ng City Epidemiology and Disease Surveillance Unit (CESU) na ang average daily new cases sa QC ay umabot na sa 149 mula Feb. 25, 2021 hanggang March 4, 2021.
Sinabi ni Belmonte ang mga lalabag sa health protocols tulad ng hindi pagsusuot ng face masks sa pampublikong lugar ay pagmumultahin on the spot para maturuan ng leksyon dahil sa paglalagay sa panganib sa kanyang buhay at sa buhay ng ibang tao.
Noong una ay nag-iisyu lamang ang lokal na pamahalaan ng Ordinance Violation Receipt (OVR) sa mga violators ay binibigyan ng pagkakataon na magbayad sa multa sa loob ng 5 araw pero ngayon ay on-the-spot nang pagmumultahin ang violators.
Binalaan din ni Belmonte ang mga establishment owners na lalabag sa minimum health standards na parurusahan lalo na ang mga hotels na gamit ang kanilang pasilidad bilang quarantine facilities para sa OFWs.
“There were reports that some quarantine hotels allow patients to leave the quarantine premises even before they finish the required quarantine period,” dagdag ni Belmonte.
Maaari rin umanong magsampa ng kaukulang kaso ang lokal na pamahalaan sa mga violators ng quarantine, isolation, at iba pang health protocols.
Plano rin ng lokal na pamahalaan na suspendihin ang pagre-release ng police clearance, occupational permit, barangay clearance at hawkers’ permit sa mga mahuhuling indibiduwal o establisimiento na ayaw magbayad ng penalty na nakasaad sa kanilang OVR.
- Latest