70% ng Marikina health workers, handang magpaturok ng Sinovac
MANILA, Philippines — Nasa 70 porsyento ng healthcare workers sa Marikina City ang nagpahayag nang kahandaan na tumanggap ng Sinovac vaccine mula China.
Ayon kay Marikina City Mayor Marcelino ‘Marcy’ Teodoro, nakumbinse at nagbigay ng consent ang mga naturang healthcare workers upang maturukan sila ng Sinovac COVID-19 vaccine.
Samantala, ang natitira pa aniyang 30 porsiyento ng healthcare workers sa lungsod ay nagpasabing maghihintay muna ng pagdating ng AstraZeneca, na siyang preferred nilang brand, bago magpaturok ng bakuna.
Bagama’t bibigyan ng pamahalaan ang mga health workers ng karapatang tumanggi ay pinayuhan naman ni Teodoro ang mga ito na mas makabubuti kung magpabakuna kaagad, sa halip na hintayin pa ang pagdating ng nais nilang vaccine brand upang magkaroon na kaagad ng proteksiyon lalo na’t palagi silang lantad sa virus.
“Mabuting may proteksyon ka na sa pagkakataong ito. Dahil kung maghihintay ka pa ng linggo o buwan bago mo matanggap ang preferred vaccine mo, ‘yung oportunidad para dun sa viral transmission ay naroon palagi,” paliwanag pa ni Teodoro, sa panayam sa radio at telebisyon.
Sinabi ni Teodoro na isa ang Amang Rodriguez Memorial Medical Center sa mga unang makakatanggap ng bakuna dahil isa itong COVID referral hospital.
Aminado naman si Teodoro na hindi kasama sa order nilang bakuna ang Sinovac, ngunit ayaw aniya nilang alisin ang pagkakataon sa mga kababayan na mabakunahan agad.
- Latest