Ilang COVID-19 vaccine recipients sa Marikina, nag-backed out
MANILA, Philippines — Kinumpirma ni Marikina City Mayor Marcelino ‘Marcy’ Teodoro na ilang recipients ng COVID-19 vaccine ang nag-backed out o umurong, isang araw bago tuluyang isagawa ang vaccination rollout sa lungsod ngayong araw.
Ayon kay Teodoro, prioritized recipients ng COVID-19 vaccines sa isang pagamutan nila ang umurong at ayaw munang magpabakuna.
“Dito sa ospital namin, to be honest and candid, meron kaming naka-schedule na babakunahan na kulang-kulang 2,000. Ito ‘yung nagbigay na ng consent. Last minute, may nag-back out na lima,” aniya, sa panayam sa radio.
Tiniyak naman ni Teodoro na naghanda ang city government ng listahan ng mga substitutes para siyang pumalit sa mga scheduled recipients na hindi sisipot sa oras ng pagbabakuna sa kanila upang hindi masayang ang mga vaccine.
Ipinaliwanag ng alkalde na maaari lamang tumagal ng hanggang limang oras ang bakuna sa sandaling ma-dilute na ito kaya’t masasayang ito kung hindi maituturok.
Ang isang vial umano ng COVID-19 vaccine ay maaaring ibigay sa apat hanggang limang recipients.
Inirekomenda naman niya na upang hindi masayang mga bakuna ay maghanda ng backup recipients ng mga ito.
- Latest