Child seat sa private cars, ipatutupad simula ngayon
MANILA, Philippines — Epektibo na simula ngayon, Pebrero 2 ang pagpapatupad sa Child Safety in Motor Vehicle Acts na magbabawal sa mga batang may edad 12-anyos pababa na umupo sa front seat ng mga pribadong sasakyan.
Ang naturang batas ay pinirmahan ni Pangulong Rodrigo Duterte noon pang nakalipas na Pebrero 2019 pero ngayon lang magiging epektibo ang mandatory compliance nito.
Base sa kautusan ang mga bata na hindi maaabot ang itinakdang height requirement ay kailangang gumamit ng child restraint system o car seat.
Idiniin ng LTO na ang child restraints sa mga sasakyan ay kailangan para na rin sa kaligtasan ng mga ito.
Sakali umanong magkaroon ng aksidente malaki ang maitutulong nito upang hindi tumilapon ang mga bata sa loob ng sasakyan.
Kasabay din nito, pinayuhan na rin ng LTO ang mga pamilyang may malalaki o matataas na anak na gumamit ng mas malakng sasakyan.
Umaasa rin ang LTO na makikipagtulungan ang publiko sa bagong batas na pasisimulang ipatupad ngayong araw.
Ang mga mahuhuling lalabag ay pagmumultahin ng mula P1,000 hanggang P5,000.
- Latest
