Ginang, inasinta sa mata, dedo
MANILA, Philippines — Binawian ng buhay ang isang ginang nang malapitang barilin sa mata ng isang ‘di kilalang salarin habang abala sa paglalaro ng games sa kanyang cellphone at nagpapaantok sa loob ng kanilang tahanan sa Brgy. Pag-asa, Quezon City, kahapon ng madaling araw.
Kinilala ang biktima na si Yolanda Cariaga, alyas ‘Dian,’ 47, at residente ng T. Sora St., San Roque-2, Brgy. Pag-asa.
Batay sa ulat ni PSMS Marvin P. Masangkay ng Quezon City Police District (QCPD)-Criminal Investigation and Detection Unit (CIDU), nabatid na dakong ala-1:40 ng madaling araw nang maganap ang krimen sa loob mismo ng tahanan ng biktima.
Nauna rito, naglalaro ng games sa kanyang cellphone ang biktima at nagpapaantok nang pasukin ng ‘di-kilalang lalaki.
Walang sabi-sabing agad na pinaputukan ng baril ng salarin ang biktima sa kanyang kanang mata, na nagresulta sa agarang pagkamatay nito.
Mabilis namang lumabas ng bahay at tumakas ang salarin.
Blangko pa ang pulisya sa motibo sa krimen habang patuloy ang isinasagawang imbestigasyon ng pulisya para matukoy ang suspect.
- Latest