Rider salpok sa taxi, patay

MANILA, Philippines — Patay ang isang rider nang sumalpok ang kaniyang sinasakyang motorsiklo sa isang taxi sa Brgy. Mariana, Quezon City, kahapon ng umaga.

Nagtamo ng matinding pinsala sa ulo at katawan ang biktimang nakilalang si Al-khalid Mahir, 29, residente ng SMDC, Welcome Rotonda, Quezon City, na nagresulta sa agaran nitong kamatayan.

Samantala, nasa kustodiya na ng Quezon City Police District (QCPD) Traffic Sector 4 ang taxi driver na si Demetrio Sabanal, 42, residente ng Reparo Road, Caloocan City, at nakatakdang sampahan ng kasong reckless imprudence resulting in homicide at da­mage to property .

Batay sa ulat ni Pat. Kervin Villa, nabatid na dakong alas-7:30 ng umaga nang maganap ang aksidente sa kahabaan ng E. Rodriguez Sr., kanto ng Ilang-ilang St. sa Brgy. Mariana.

Nauna rito, sakay ng kanyang Suzuki Raider 150 na may plakang 136610 ang biktima at kasalukuyang binabaybay ang nasabing lugar, nang bigla na lang umano itong sumalpok sa kanang bahagi ng taxi (UVK-714 ) na minamaneho naman ni Sabanal.

Sa lakas ng impact nang pagkakabangga ay tumilapon si Mahir, at natanggal ang suot nitong helmet kaya’t matinding napinsala ang ulo dito nang tumama ito sa sementadong kalsada.