Bikers exempted sa face shield

Kinokonsidera ng DOH

MANILA, Philippines — Kinokonsiderang irekomenda ng Dept. of Health (DOH) na i-exempt sa pagsusuot ng face shields ang mga solo-riding cyclist.

Ito’y matapos na magpahayag nang pagkabahala ang publiko at ilang eksperto sa pagpapasuot ng full-face shields sa mga bikers o cylist lalo na sa kanilang physical activity.

“So itong nagka-face shield when you do your biking ating pag-uusapan. Pero nakikita natin na we can consider this as long as alone sila at nagbibisikleta at ‘pag tumigil na sila at pumunta sa matataong lugar kailangan na nilang magsuot,” ayon kay Health Undersecretary Maria Rosario Vergeire.

Bukod dito sinabi pa ni Vergeire na kinokonsidera rin nila na ma-exempt dito ang mga may sakit na nahihirapang huminga at motorista na nagmamanehong mag-isa.

Kaugnay nito nakatakdang maglabas ng joint administrative order ang DOH sa iba pang agensya sa guidelines para sa paggamit ng face shields.

Sa panig naman ni National Task Force for CO­VID-19 chief implementer Secretary Carlito Galvez na pag-uusapan nila ang laman ng naturang kautusan sa darating na Lunes.

“Ang sinasabi natin mag-face shield kayo especially when you are interacting with other people and when youre going in places that are crowded,” dagdag pa nito.

Samantala, sa Pasig City tuluyan nang pinahintulutan ng City Transport Development and Management Office (CTDMO)ang mga bikers o siklista na hindi magsuot ng face shields kung magbibisikleta sila sa bisinidad ng lungsod.

Sa paskil ng ‘Pasig Transport,’ na siyang official Facebook page ng CTDMO ng Pasig City government, nabatid na ang exemption ay ipinatupad matapos ang konsultasyon sa mga bikers at pagkakita ng ebidensiya na ang pagbibisikleta ng nakasuot ng face shield ay mapanganib.

Bukod kasi anila sa mahihirapan nang huminga ang mga siklista ay hindi pa nila makikitang mabuti ang kanilang dinaraanan, na maaaring magdulot ng aksidente.

Paliwanag pa nito, isolated na rin naman ang mga bikers mula sa iba pang commuters.

“Bikers are exempted from wearing face shield while biking in Pasig,” paskil pa nito. “Evidence shows and consultation among bikers reveals that biking while wearing a face shield is dangerous.”

“Wearing a face shield obstructs view and makes breathing difficult,” dagdag pa nito. “Meanwhile, biking naturally isolates riders from other commuters.”