2 patay sa sunog sa Pasay
MANILA, Philippines — Dalawang babae ang nasawi, habang sugatan ang anim na indibiduwal kabilang ang apat na fire volunteers sa sunog na naganap sa siksikang residential area, sa Tramo St., sakop ng Brgy. 43, Pasay City, kahapon ng umaga.
Kinilala ang mga nasawi na sina Cindy Navarro, 29 at Lyn Ebona, 39, na kapwa natagpuan sa nasunog at gumuhong bahay sa isinagawang mopping operation ng mga tauhan ng Pasay Fire Station.
Sa inisyal na ulat na ipinadala sa Southern Police District-Public Information Office (SPD-PIO) nagsimula ang sunog dakong alas-5:47 ng umaga sa inookupahang ikalawang palapag ng 5-storey apartment ng isang Joan Libanan, sa Tramo St. Umakyat lang sa 2nd alarm ang sunog at idineklarang fire-out dakong alas -7:53 ng umaga na puminsala sa 8-10 kabahayan .
Pansamantalang nanuluyan sa Rafael Palma Elementary School ng mga pamilyang nasunugan.
Tinatayang nasa P300-libo ang halaga ng ari-ariang napinsala.
Sa impormasyon, ang nasawing si Navarro ay bumalik sa loob ng bahay para iligtas ang anak subalit na-trap na ito sa apoy.
- Latest