Klase sa Marikina ,1-buwan suspendido

Dahil sa pananalasa ni ‘Ulysses’

MANILA, Philippines — Dahil sa matinding pinsalang idinulot ng bagyong Ulysses, nagpasya si Marikina City Mayor Marcy Teodoro na suspendihin sa loob ng isang buwan ang klase sa lahat ng antas sa lungsod pampubliko at pribado.

Ipinaliwanag ng alkalde na ang suspensyon ay dahil sa nananatili pa ring unstable ang internet connection sa lungsod kung saan nasira ng bagyo ang mga modules ng mga mag-aaral  matapos na malubog sila sa baha.

“One month suspension [of classes] from this week, starting today (November 16) and for the next four weeks,” anunsiyo ni Teodoro kahapon.

Patuloy ang  isinagawang relief operation ng national government sa lungsod, sa pangunguna nina Sen. Christopher Go, Trade, Industry Sec. Ramon Lopez,  PCSO Charity Assistance Department OIC Manager Jerusa Corpuz, at iba pang mga opisyal ng pamahalaan.

Sinabi ng alkalde na nais niyang mabigyan ng sapat na panahon ang mga school officials na mag-reproduce at makapag-distribute muli ng mga learning modules sa kanilang mga mag-aaral.

Mabibigyan din aniya nito ng sapat na panahon ang lokal na pamahalaan at mga residente na makapagsagawa ng clean-up operation dahil malaking bahagi pa ng lungsod ang nananatili pa ring natatabunan ng putik, kasunod ng malawakang pagbaha dahil sa bagyo.

“Paano makakapag-klase iyong mga bata maski may module at gadget siya kung nakalubog sa putik ang kanyang paa habang nag-aaral,” pahayag pa ng alkalde.

“We need to establish a proper environment. Yung ang tingin ko na kailangang-kailangan natin gawin sa ngayon,” dagdag pa niya.

Samantala, aminado naman ang alkalde na posible pang mapalawig ang suspensiyon ng klase kung hindi pa handa ang mga estudyante, gayundin ang mga learning materials na kanilang gagamitin. Matatandaang isa ang Marikina sa pinakamatin­ding tinamaan ng hagupit ng bagyong Ulysses, kaya’t malaking bahagi nito ang binaha, matapos na umapaw ang water level ng Marikina River ng hanggang 22 metro.

Libu-libong pamilya rin sa lungsod ang napilitang lumikas mula sa kani-kanilang mga tahanan habang may ilang buhay rin ang nasayang dahil sa bagyo.