Preso patay sa ‘COVID-19’
MANILA, Philippines — Nalagutan ng buhay sa pinagdalhang pagamutan ang isang bilanggo ng Sta. Cruz Police Station makaraang mahirapan sa kaniyang paghinga sa loob ng siksikang selda, kamakalawa ng gabi.
Hindi na muna pinanga-lanan ang nasawing inmate na may edad 45-anyos.
Sinabi ni Manila Police District OIC spokesman, P/Capt. Henry Navarro na inaalam na ngayon kung may taglay siyang COVID-19.
Nabatid na dalawang linggo nang nakapiit sa Station 3 Detention Cell ang suspek nang mahuli noong Oktubre 24 dahil sa kasong illegal possession of firearms, carnapping at disobedience sa pulisya.
Bago isugod sa pagamutan, nagreklamo na siya ng paninikip ng dibdib at hirap sa paghinga hanggang sa tuluyang mawalan ng malay.
Sinabi ni Navarro na isinailalim na sa awtopsiya ang bangkay at hinihintay na lamang ang resulta kung kumpirmado na isa siyang COVID positive o ibang uri ng sakit ang dumapo sa kanya.
- Latest