7-anyos ayaw kumain, napatay ng ama
MANILA, Philippines — Patay ang isang paslit nang puwersahang salpakan ng pagkain at bugbugin sa ulo at katawan ng sariling ama dahil sa ayaw umano kumain sa Taguig City, kamakalawa ng gabi.
Dead-on-arrival sa Taguig-Pateros District Hospital ang biktimang si Johncel Pedriguez, 7 taong gulang, residente ng Road 39, Block 5, Lot 12 Barangay North Daang hari, Taguig City.
Arestado naman at nakatakdang sampahan ng kasong parricide ang suspek na si Arnold Perdiguez Y Libanos, 28-anyos, matapos pormal na maghain ng reklamo ang live-in partner niya, na ina ng biktima, na si Luz Montales y Cadina.
Sa imbestigasyon ng Taguig Police Station, dakong alas 9:00 ng gabi nang tumatanggi umano ang bata sa mga subo habang pinapakain ng ama. Ikinagalit umano ng suspek at pinilit pang subuan bago pinagsusuntok sa ulo at katawan.
Bandang alas 4:34 ng madaling araw nang mapansin na ang kakaibang hitsura ng anak kaya isinugod ng mag-asawa sa nasabing ospital subalit hindi na umabot ng buhay bandang alas 4:42 ng madaling araw.
Katuwiran umano ng suspek, dinidisiplina niya lang ang anak at walang intensiyong masama.
- Latest
