Molecular laboratory ng Quezon City , nakapasa sa DOH proficiency test
QUEZON CITY, Philippines — Maaari na ngayong magproseso ng COVID-19 test ang Quezon City government-molecular laboratory sa loob lamang ng isang araw.
Ito ay makaraang makapasa na ang sariling QC molecular laboratory sa proficiency test na itinakda para dito ng Department of Health (DOH).
Ang proficiency test ng Quezon City Molecular Diagnostics Laboratory ay naipalabas kahapon ng DOH-Research Institute for Tropical Medicine (RITM) at nakakuha ng perfect score na 100 percent matapos makakuha ng lahat ng accurate results mula sa limang samples na naberepika sa ginawang counter checking ng RITM.
Masaya namang tinanggap ni QC Mayor Joy Belmonte ang balitang ito dahil ang molecular laboratory anya ay makakatulong ng malaki para higit na mapalawak ang kampanya ng lokal na pamahalaan laban sa mga nakamamatay na virus tulad ng COVID..
“Through this laboratory, we can now process test results faster, thus allowing us to act quickly on the isolation and treatment of patients.Mas mabilis din tayong makakakilos pagdating sa contact tracing kaya maagapan natin ang pagkalat ng virus sa ating mga komunidad,” pahayag ni Belmonte.
Ayon kay Dr. Rolly Cruz, head ng City Epidemiology and Disease Surveillance Unit (CESU), ang mabilis na turnaround time na naibibigay ng molecular laboratory ay malaking tulong sa community testing program ng QC.
Sinabi naman ni Joseph Juico, QC COVID-19 task force head na ang pag-apruba sa molecular laboratory ay nangangahulugan ng bawas gatos ng lokal na pamahalaan at hindi na kailangang magbayad sa mga private hospitals at laboratories para sa pagsusuri.
- Latest
