P1.4 milyong shabu nasabat sa drug-bust
MANILA, Philippines — Aabot sa P1.4 milyong halaga ng shabu at marijuana ang nasabat sa dalawang hinihinalang ‘tulak’ ng ilegal na droga sa ikinasang buy-bust operation ng Pasay City Police, kamakalawa ng gabi sa naturang lungsod.
Kinilala ang mga nadakip na sina Isabelo Balabat, alyas Biloy, 32, at si Ferdinand Conde, alyas Randy, 63, kapwa nakatira sa Area H Chest Clinic Compound, Brgy. 186, ng naturang lungsod.
Sa ulat ng Pasay City Police, alas-10:15 ng gabi nang magkasa ng buy-bust operation ang kanilang Station Drug Enforcement Unit (SDEU) sa naturang compound makaraan ang sumbong ng ilegal na operasyon sa droga na nagaganap dito.
Isang pulis ang nagpanggap na buyer at matagumpay na nakabili ng shabu sa mga suspek. Nang magbigay ng senyales, dito na pinasok ng mga operatiba ang loob ng compound at ipinatupad ang pag-aresto sa dalawang suspek.
Nakumpiska sa posesyon ng dalawa ang dalawang ‘knot-tied plastic bag at anim na maliit na plastic sachet na naglalaman ng nasa 217 gramo ng shabu na may halagang P1,475,600; 24 na plastic sachet na naglalaman ng hinihinalang marijuana na may halagang P3,012; isang caliber 9mm na Armscor na baril na may magazine at laman na tatlong bala. Narekober din ang isang P1,000 marked money na inihalo sa 34 pang boodle money na ipinambayad sa mga suspek.
- Latest
