Higit P164 milyong shabu nasabat: 7 arestado
MANILA, Philippines — Mahigit sa 24 na kilo ng hinihinalang shabu ang nakumpiska ng mga tauhan ng Philippine Drug Enforcement Agency (PDEA), habang pitong drug suspects naman ang kanilang naaresto sa tatlong buy-bust operation na kanilang isinagawa sa mga lungsod ng Parañaque at Taguig, nabatid kahapon.
Batay sa ulat ng PDEA, na pinamumunuan ni Director Generel Wilkins Villanueva, unang naaresto dakong alas-3:30 ng hapon kamakalawa sina Mangie Sotolombo, 49, pintor at Carlos Vallente, 27.
Nakumpiska mula sa kanila ang tinatayang nasa 20 kilo ng shabu na nagkakahalaga ng P136 milyon at isang unit ng cellphone.
Samantala, pasado alas-4:00 naman ng hapon kamakalawa nang maaresto ang suspek na si Marivic Aswilo Mabascog, 50, isang housemaid, at residente Maricaban, Pasay City sa kahabaan ng Pacific Avenue, Brgy. Dongallo, Parañaque City.
Nasamsam mula sa kanya ng mga awtoridad ang tinatayang may apat na kilo ng shabu na may street value na P27,200,000 at isang unit ng cellphone.
Sa kabilang dako, ang mga suspek naman na sina Norsiya Salvador Ahin, 34, at Puti Salik, 30, construction worker; Baitata Salaiman Sultan, 24, vendor, at Unday Mupak, 32, pawang ng Taguig City, ay naaresto dakong alas-11:00 ng umaga kahapon sa isang parking lot ng Sunshine Mall Plaza, Western Bicutan.
Narekober mula sa mga suspek ang may 200 gramo ng hinihinalang shabu na may street value ng P1,360,000, at ‘di tinukoy na halaga ng buy-bust money.
Ang mga suspek ay pawang nakapiit na at sasampahan ng kasong paglabag sa Republic Act 9165 o The Comprehensive Dangerous Drugs Act of 2002
- Latest
