Vendors sa 17 palengke sa Maynila ipaprayoridad sa swab testing
MANILA, Philippines — Nangako si Manila City Mayor Isko Moreno na unang isasailalim sa ‘swab testing’ ang mga vendors sa 17 pampublikong palengke sa pagbubukas ng ikalawang RT-PCR molecular laboratory sa Sta. Ana Hospital.
Sinabi ni Moreno na kailangang maisailalim sa swab testing ang mga vendors upang matiyak na ligtas mula sa COVID-19 ang mga namimili sa mga palengke.
“Sa ayaw at gusto natin pupuntahan talaga ang mga palengke kung bibili sila ng pagkain,” ayon sa alkalde.
“Bibigyan natin ng kapanatagan ang tao, ang manininda at higit sa lahat, ‘yung mga mamimili,” dagdag niya.
Sinabi pa ng alkalde na inatasan na niya sina Manila Health Department director Dr. Arnold Pangan, Sta. Ana Hospital director Dr. Grace Padilla, at Market Administrator Zenaida Mapoy na gawing prayoridad ang mga vendors sa isasagawang swab tests.
Isusunod naman ng MHD ang mga tsuper ng pedicab, tricycle, at jeepneys; pati ang mga matadero o meat butchers. (Danilo Garcia)
- Latest
