Pekeng BIR enforcer, tiklo sa kotong
MANILA, Philippines — Arestado ang isang 68-anyos na lalaki makaraang ireklamo ng isang negosyante ng pangongotong matapos siyang magpanggap na enforcer ng Bureau of Internal Revenue (BIR) kamakalawa ng hapon sa Binondo, Maynila.
Kinilala ang nadakip na si Vicente Alberto, alyas Vic, ng Gracepark, Caloocan City.
Sa ulat ng Manila Police District-Special Mayor’s Reaction Team, unang nagsampa ng reklamo sa kanila si Adonis Tan, 57, may-ari ng PENCO Incorporated sa Binondo, ukol sa pangongotong sa kanila ng suspek.
Isinalaysay ni Tan na nagtungo sa kanilang kompanya si Alberto na nagpakilalang Revenue Enforcement Officer III ng BIR at inakusahan sila na hindi nagbabayad ng tamang buwis. Nanghingi umano ang suspek ng P25,000 para maisyuhan ang kanilang kumpanya ng BIR Clearance Certificate.
Agad na nagtungo ang mga pulis sa kompanya ni Tan kung saan inabutan si Alberto na nagpakita ng BIR ID sa at mga “mission order/BIR Clearances” na umano’y mga peke. Nang tawagan ng mga pulis ang BIR, dito nadiskubre na hindi siya empleyado ng ahensya dahilan para arestuhin ang suspect.
- Latest
