Lockdown violators sa Navotas umabot na sa 2,824

MANILA, Philippines — Umabot na sa 2,824 na indibiduwal na lockdown violators nadakip ng mga awtoridad sa Navotas City.

Ayon kay Navotas Mayor Toby Tiangco, hihigpitan pa nila ang pagpapatupad ng lockdown at pagdakip sa mga pasaway.

Aniya, hinihingi lamang nila ay kooperasyon ng lahat at ang paggamit ng mga safety protocols.

Kung wala naman pong rason para lumabas, manatili po muna sa bahay. Kapag lalabas, magsuot ng mask na natatakpan ang ilong at bibig, dumistansya ng 1-2 metro mula sa mga kasama, at sundin ang iba pang mga patakarang ipinapatupad para maging ligtas tayo sa COVID-19”, ani Tiangco.

Samantala, 21 naman ang nadagdag na bagong kaso ng COVID-19 sa lungsod at 28 ang gumaling.

Hanggang alas-8 ng gabi ng Hulyo 20 ay umabot na sa 1,236 ang kumpirmadong kaso ng COVID-19 sa Navotas. 634 dito ang mga active cases, 525 ang gumaling habang hindi nadagdagan ang bilang ng namatay na 77.