Armored personnel carriers dinala sa Navotas
Sa pagpapairal ng lockdown
MANILA, Philippines — Inilatag ng National Capital Region Police Office (NCRPO) kahapon ang dalawang armored personnel carrier sa Navotas City sa pagsisimula ng 14 na araw na lockdown sa lungsod.
Personal na ininspeksyon ni NCRPO chief Police Major General Debold Sinas ang sitwasyon sa Navotas, gayundin ang mga barangay officials katuwang ng pulis na magbabantay sa lockdown.
Ayon kay Sinas layon ng dalawang APC na mapigil ang paggala ng mga residente at paalalahanan ang mga residente sa presensya ng pulisya sa lugar.
Una nang sinabi ng PNP na tutulong ang mga tauhan ng Special Action Force sa pagpapatupad ng lockdown sa Navotas.
Matatapos ang lockdown sa Hulyo 29.
Samantala, ipinatutupad na rin ng lungsod ang City Ordinance No. 2020-33 na nagtatakda ng 24-hour curfew para sa lahat ng mga menor de edad o batang wala pang 18 taong gulang.
Nangangahulugan na hindi pwedeng lumabas ng bahay ang mga menor-de-edad maliban lamang kung sila ay mag-ienrol kasama ang kanilang magulang o guardian o kung may emergency.
Kung hahayaan ng mga magulang na gumala o tumambay at maglaro ang kanilang mga anak, may kakaharaping parusa ang mga ito.
- Latest