Biyahe ng MRT-3 bus augmentation program, inagahan

MANILA, Philippines  — Bilang tugon sa hiling ng mga pasaherong apektado ng pansamantalang shutdown ng Metro Rail Transit Line 3 (MRT-3), pinaaga na ng Department of Transportation (DOTr) ang pag-dispatch ng MRT-3 Bus Augmentation Program simula kahapon.

Alinsunod sa kautusan ni Department of Transportation (DOTr) Secretary Arthur Tugade, mula sa dating alas-5:30 ng umaga ay ginawa nang 4:00AM ang simula nang pag-dispatch ng mga bus para mas maagang maihatid ang kanilang mga pasahero sa destinasyon ng mga ito.

“Alinsunod po sa direkti-ba ni Secretary Tugade, ki­nausap po natin ‘yung bus company at nakuha po natin ang kanilang commitment na mag-start ng bus dispatching ng alas-kwatro ng madaling araw simula kahapon. Para sa mga commuter ito. Para sa bayan,” ayon kay MRT-3 Director for Operations Michael J. Capati.

Aniya, layunin din nitong mapaikli ang pila ng mga commuter sa mga designa-ted stations, lalo na habang rush hour sa umaga.

Mahigpit din ang habilin ni Tugade sa MRT-3 na si-guraduhing maipatutupad ang 3-minute regular dispatch system ng mga bus sa ilalim ng programa.

Matatandaang una nang nagpatupad ng temporary shutdown ang MRT-3 mula Hulyo 7 hanggang Hulyo 11 matapos na makapagtala ng pagdami ng mga personnel nilang dinapuan ng coronavirus disease (COVID-19).

Sa pinakahuling ulat, nabatid na umabot na sa 203 ang bilang ng MRT-3 personnels na nagpositibo sa virus.