LGBT leader, 20 miyembro nagrali sa Mendiola, inaresto
Pulis winisikan pa ng asido
MANILA, Philippines — Nasa 20 miyembro ng isang LGBT community kabilang ang kanilang lider ang inaresto kahapon ng mga tauhan ng Manila Police District (MPD) nang magsagawa ng kilos-protesta sa Mendiola sa kabila nang pagbabawal sa ‘mass gathering’ dahil sa pinaiiral na community quarantine.
Nasa kustodiya ng MPD-General Assignment Section ang mga miyembro ng grupong Pride March Protesters sa pangunguna ni Rey Valmires Salinas.
Nabatid na alas-11:40 ng umaga nang magkagirian ang mga tauhan ng MPD at mga demonstrador sa may Mendiola. Ipinoprotesta ng grupo ng LGBT ang Anti-Terrorism Bill.
Sinabi ni MPD-GAS chief, P/Capt. Arnold Echalar na nag-umpisa ang komosyon nang isa sa mga demonstrador ang umano’y nagwisik ng likido sa isa sa mga pulis. Isa na umano itong uri ng ‘assault’ kaya minabuting i-disperse ang rally at arestuhin ang mga sangkot.
Sasampahan ng kasong paglabag sa Bayanihan Heal as One Act ang grupo kaugnay sa probisyong may kinalaman sa pagbabawal sa mass gathering.
Maaari rin silang masampahan ng kasong paglabag sa Article 151 ng Revised Penal Code o ang Disobedience to a Person in Authority.
- Latest