52 Navoteño nabigyan ng scholarship
MANILA, Philippines — Laking tuwa ng nasa 52 mag-aaral at gurong Navoteño nang makatanggap ng Navotas Scholarship Program mula sa Pamahalaang Lungsod ng Navotas para sa school year 2020-2021.
Ayon kay Navotas Mayor Toby Tiangco, kasama sa batch ng academic scholars ngayong taon ang 30 incoming high school freshmen, 15 incoming freshmen ng Navotas Polytechnic College (NPC), dalawang incoming freshmen sa kolehiyo o unibersidad na kanyang pipiliin, at limang mga guro na nais magkaroon ng mas mataas na edukasyon.
Aniya, sinusuportahan nila ang mga Navoteño na nagsisikap sa pag-aaral para maabot ang potensyal at makatulong sa kanilang pamilya at komunidad sa susunod na mga panahon.
Nagbibigay ang pamahalaang lungsod sa high school scholars ng P18,000 para sa kanilang mga aklat, pamasahe at pagkain.
P22,000 ang nakukuha ng mga NPC scholars para sa kanilang tuition, mga aklat, pamasahe at pagkain. P262,000 naman ang ibinibigay sa mga scholars sa ibang kolehiyo o unibersidad.
Samantala, nakatanggap ng P75,000 ang mga teacher scholars bilang panustos sa kanilang tuition, mga aklat, pamasahe at pagkain, pati na research.
Maliban sa academic scholarship, may scholarship din ang pamahalaang lungsod para sa mga estudyanteng magaling sa sports at sa sining, at para sa mga anak o kaanak ng Top Ten Outstanding Fisherfolk.
- Latest