4.1 milyong food packs naipamahagi ng Quezon City government
MANILA, Philippines — Mahigit apat na milyong food packs na ang naipamahagi ng Quezon City government para sa kanilang mga residente sa kasagsagan ng community quarantine.
Ayon kay Quezon City Mayor Joy Belmonte, nasa kabuuang 4,124,989 food packs ang naibigay nila bilang tulong sa mga residente na apektado ng quarantines na ipinatupad ng pamahalaan para pigilan ang pagkalat ng coronavirus disease 2019 (COVID-19) sa bansa.
Dahil sa naturang bilang, lumilitaw na ang QC ang nagpamahagi ng pinakamaraming food packs sa buong Metro Manila.
Bukod naman sa mga naturang food packs, namigay rin ang QC LGU ng financial assistance na tig-P2,000 para sa 53,397 qualified na residente.
Samantala, inianunsiyo rin ni Mayor Belmonte na ang mga kuwalipikadong residente na hindi kabilang sa DSWD SAP ay nakatanggap din ng tig-P4,000 mula sa lokal na pamahalaan.
Nabatid na humingi ang QC, na may pinakamaraming populasyon sa Metro Manila ng SAP cash aid para sa 600,000 beneficiaries ngunit 377,584 na QC beneficiaries lamang ang nabigyan nito.
- Latest