10 barangay sa Navotas isinailalim sa ECQ
MANILA, Philippines — Sa kabila ng pagdedeklara ng Modified Enhanced Community Quarantine sa Metro Manila, isinailalim naman ni Navotas City Mayor Toby Tiangco sa ECQ simula ngayong araw ang 10 sa kanyang barangay na may matataas na kaso ng COVID-19.
Ayon kay Tiangco, sa RIATF NCR Resolution No. 3, pinayagan ang lungsod na isailalim sa ECQ ang mga Barangay NBBS Dagat-Dagatan, NBBS Kaunlaran, NBBS Proper, San Jose, NBBN, Sipac Almacen, Daanghari, Tangos North, Tangos South, at San Roque. Tatagal ang ECQ hanggang Mayo 31.
Ang mga residenteng tanging may hawak ng mga home quarantine pass (HQP) ang makalalabas para mamili ng pangangailangan. Walang bagong HQP na maaaring iisyu ang barangay, patuloy na ipapatupad ang schedule sa pamamalengke.
Aniya ang HQP ay may bisa lamang para sa pamimili ng pagkain, grocery, gamot at iba pang pangangailangan. Ito ay maaari lamang gamitin sa araw ng schedule ng barangay.
Ang mga essential workers o mga manggagawang exempted ng IATF, tulad ng mga nagtatrabaho sa fishport, ay maaari pa ring pumasok sa trabaho dala ang kanilang company ID o certificate of employment.
- Latest