Rehabilitasyon ng Roxas Boulevard, pinasisimulan
MANILA, Philippines — Inaprubahan ni Manila Mayor Isko Moreno ang pagsasagawa ng konstruksyon ng Department of Public Works and Highways (DPWH) para sa rehabilitasyon ng Roxas Boulevard matapos na makitaan ng malalaking bitak.
Partikular na kukumpunihin ang bahagi ng Remedios Street maging ang drainage system sa Malate na nakapaloob sa kahilingan ni DPWH Engr. Mikunug Macud.
Tatagal ang pagkumpuni mula Mayo 21 hanggang Hunyo 25, 2020 at inaasahan na wala nang ekstensyon na ibibigay sa DPWH para mas maging maayos ang biyahe ng mga delivery trucks patungo sa Port of Manila.
Nagpatupad na rin ng pagsasara ng bahagi ng Roxas Boulevard na kukumpunihin at pinayuhan ang mga motorista na sundin ang itinakdang alternatibong ruta o kaya ay umiwas na lamang na dumaan sa naturang kalsada.
Pinulong din ng alkalde ang nasa 57 business leaders sa lungsod na hinikayat niyang magsagawa ng COVID testing sa kanilang mga empleyado kapag magbabalik na sila sa operasyon.
Handa naman na tumulong ang Pamahalaang Lungsod sa testing kung hindi kakayaning sagutin ng mga negosyante, pagtitiyak ng alkalde.
- Latest
