Pagbabalik sa trabaho ng residente ng Maynila, kailangan na - Isko
MANILA, Philippines — Kinakailangan na umanong bumalik sa trabaho ang mga residente ng Maynila upang masustentuhan ang kani-kanilang pamilya dahil sa hindi naman kaya ng pamahalaan na suplayan ang pangangailangan ng publiko.
Ito ang inihayag ni Manila Mayor Isko Moreno kasabay ng pagsang-ayon niya sa paglalagay sa National Capital Region (NCR) sa ‘‘modified ECQ’’ at payagang makapag-operate ang ilang negosyo.
“It’s a happy development. In our case, we are longing for this that some industries should be open for the simple reason na yung buhay, kabuhayan hindi natin pwedeng paghiwalayin,” ani Domagoso.
Sinabi ng alkalde na hindi na kayang tugunan ng pamahalaan ang pangangailangan ng mga pamilya kabilang na ang pagbibigay ng tulong-pinansyal at food packs. Sa pamamagitan ng pagbubukas ng ilang industriya ay makatutulong sa problemang ito.
“This is unsustainable. Ang gobyerno tatakbo pag siya ay may pondo at ang pondo ay manggagaling sa mga buwis ng mga taong nagtatrabaho at mga negosyong kumikita,”paliwanag ni Domagoso.
Makatutulong rin ang pagbabalik sa trabaho sa agam-agam ng mga residente ng Maynila lalo ngayon na labis ang init ng panahon kahit na nasa loob ng bahay ang mga pamilya.
Upang mapawi rin ang pangamba na dumami ang kaso ng COVID-19, patuloy pa rin naman umano ang agresibong ‘‘contact tracing’’ at ‘‘rapid testing’’ na kanilang ginagawa para matukoy ang mga may-sakit at maihiwalay sa publiko saka gagamutin.
- Latest
